ನಾವು ವಾಟ್ಸ್‌ಆಪ್ ಒಂದರಲ್ಲೇ ದಿನಕ್ಕೆ 65 ಬಿಲಿಯನ್ ಸಂದೇಶಗಳನ್ನು ಕಳಿಸುತ್ತಿದ್ದೇವೆ
ನಾವು ವಾಟ್ಸ್‌ಆಪ್ ಒಂದರಲ್ಲೇ ದಿನಕ್ಕೆ 65 ಬಿಲಿಯನ್ ಸಂದೇಶಗಳನ್ನು ಕಳಿಸುತ್ತಿದ್ದೇವೆPeople vector created by pikisuperstar - www.freepik.com

ಮೊದಲ ಮೆಸೇಜಿಗೆ ಐವತ್ತು ವರ್ಷ!

ಅಂತರಜಾಲ ಸಂಪರ್ಕ ಬಳಸಿಕೊಂಡು ಬೇಕಾದಷ್ಟು ಮೆಸೇಜು ಕಳಿಸುವುದನ್ನು ಕಲಿತ ಮೊದಲ ತಲೆಮಾರು ನಮ್ಮದು, ಸರಿ. ಆದರೆ ನಮಗಿಂತ ಮೊದಲು ಬೇರೆ ಯಾರೂ ಅಂತರಜಾಲದಲ್ಲಿ ಸಂದೇಶಗಳನ್ನೇ ಕಳಿಸಿರಲಿಲ್ಲವೇ?

ವಾಟ್ಸ್‌ಆಪ್, ಟೆಲಿಗ್ರಾಂ ಮತ್ತಿತರ ಓವರ್-ದ-ಟಾಪ್ (ಓಟಿಟಿ) ಆಪ್‌ಗಳ ಸಹಾಯದಿಂದ, ಅಂತರಜಾಲ ಸಂಪರ್ಕ ಬಳಸಿಕೊಂಡು ಬೇಕಾದಷ್ಟು ಮೆಸೇಜು ಕಳಿಸುವುದನ್ನು ಕಲಿತ ಮೊದಲ ತಲೆಮಾರು ನಮ್ಮದು. ಒಂದು ಎಸ್ಸೆಮ್ಮೆಸ್‌ಗೆ ಇಷ್ಟು ಪೈಸೆ ಎನ್ನುವ ಕಾಲದಿಂದ ಡೇಟಾಗೆ ದುಡ್ಡು ಕೊಡಿ, ಎಷ್ಟಾದರೂ ಮೆಸೇಜ್ ಕಳಿಸಿಕೊಳ್ಳಿ ಎನ್ನುವ ಕಾಲಕ್ಕೆ ದಿಢೀರನೆ ಬಂದು ಖುಷಿಪಟ್ಟವರೂ ನಾವೇ. ಆದರೆ ನಮಗಿಂತ ಮೊದಲು ಬೇರೆ ಯಾರೂ ಅಂತರಜಾಲದಲ್ಲಿ ಸಂದೇಶಗಳನ್ನೇ ಕಳಿಸುತ್ತಿರಲಿಲ್ಲವೇ?

ಖಂಡಿತಾ ಕಳಿಸುತ್ತಿದ್ದರು. ನಿನ್ನೆ ಮೊನ್ನೆಯ ಮಾತೆಲ್ಲ ಏಕೆ, ಇವತ್ತಿಗೆ ಐವತ್ತು ವರ್ಷಗಳ ಹಿಂದೆಯೇ ಅಂತರಜಾಲದ ಮೂಲಕ ಸಂದೇಶವೊಂದನ್ನು ಕಳಿಸಲಾಗಿತ್ತು. ಅಂತರಜಾಲದ ಮೂಲಕ ಕಳಿಸಲಾದ ಆ ಮೆಸೇಜಿನ ಐವತ್ತನೇ ಹುಟ್ಟುಹಬ್ಬ ಇವತ್ತು (ಅಕ್ಟೋಬರ್ ೨೯, ೨೦೧೯)!

ತಮಾಷೆಯ ವಿಷಯವೆಂದರೆ ಆಗಿನ್ನೂ ಅಂತರಜಾಲಕ್ಕೆ ಆ ಹೆಸರನ್ನೇ ಇಟ್ಟಿರಲಿಲ್ಲ. 'ಅಡ್ವಾನ್ಸ್ಡ್ ರೀಸರ್ಚ್ ಪ್ರಾಜೆಕ್ಟ್ಸ್ ಏಜೆನ್ಸಿ ನೆಟ್ವರ್ಕ್' (ಆರ್ಪಾನೆಟ್) ಎಂಬ ಹೆಸರಿನಲ್ಲಿ ಅಂತರಜಾಲದ ಪರಿಕಲ್ಪನೆ ಆಗಿನ್ನೂ ರೂಪುಗೊಳ್ಳುತ್ತಿತ್ತು. ಅಮೆರಿಕಾದ ರಕ್ಷಣಾ ಇಲಾಖೆಯ ನೇತೃತ್ವದಲ್ಲಿ ಹಲವು ವಿಶ್ವವಿದ್ಯಾಲಯಗಳು ಹಾಗೂ ಸಂಶೋಧನಾ ಸಂಸ್ಥೆಗಳು ಈ ಪರಿಕಲ್ಪನೆಯನ್ನು ಬೆಳೆಸುವ ನಿಟ್ಟಿನಲ್ಲಿ ಕೆಲಸಮಾಡುತ್ತಿದ್ದವು.

ಇಂತಹ ಸಂಸ್ಥೆಗಳ ಪೈಕಿ ಲಾಸ್ ಏಂಜಲೀಸ್‌ನ ಕ್ಯಾಲಿಫೋರ್ನಿಯಾ ವಿಶ್ವವಿದ್ಯಾಲಯವೂ (ಯುಸಿಎಲ್‌ಎ) ಒಂದು. ಆ ಸಂಸ್ಥೆಯ ಪ್ರಾಧ್ಯಾಪಕರು, ವಿದ್ಯಾರ್ಥಿಗಳು ಅರ್ಪಾನೆಟ್ ಬಳಸಿ ಹಲವು ಚಟುವಟಿಕೆಗಳನ್ನು ನಡೆಸಿದ್ದರು. ೧೯೬೯ರ ಅಕ್ಟೋಬರ್ ೨೯ರಂದು ಅಲ್ಲಿನ ವಿದ್ಯಾರ್ಥಿ ಚಾರ್ಲಿ ಕ್ಲೈನ್ ಎಂಬಾತ, ಪ್ರಾಧ್ಯಾಪಕ ಲಿಯೊನಾರ್ಡ್ ಕ್ಲೈನ್‌ರಾಕ್ ಮಾರ್ಗದರ್ಶನದಲ್ಲಿ, ತನ್ನ ಕಂಪ್ಯೂಟರಿನಿಂದ ಒಂದು ಸಂದೇಶ ಕಳಿಸಲು ಪ್ರಯತ್ನಿಸಿದ. ೩೫೦ ಮೈಲಿ ದೂರದ ಸ್ಟಾನ್‌ಫರ್ಡ್ ರೀಸರ್ಚ್ ಇನ್ಸ್‌ಟಿಟ್ಯೂಟ್‌ನಲ್ಲಿದ್ದ ಇನ್ನೊಂದು ಕಂಪ್ಯೂಟರಿಗೆ ಆ ಸಂದೇಶ ತಲುಪಬೇಕು ಎನ್ನುವುದು ಅವನ ಗುರಿಯಾಗಿತ್ತು. ಬಿಲ್ ಡುವಲ್ ಎಂಬ ತಂತ್ರಜ್ಞ ಅಲ್ಲಿ ಈತನ ಸಂದೇಶವನ್ನು ನಿರೀಕ್ಷಿಸುತ್ತಿದ್ದ.

ಕ್ಯಾಲಿಫೋರ್ನಿಯಾ ವಿವಿಯಲ್ಲಿ ಈ ಪ್ರಯೋಗಕ್ಕೆ ಬಳಕೆಯಾಗಿದ್ದು ಸಿಗ್ಮಾ 7 ಎಂಬ ಮೈನ್‌ಫ್ರೇಮ್ ಕಂಪ್ಯೂಟರ್. 128 ಕೆಬಿ ಮೆಮೊರಿ ಹಾಗೂ 24 ಎಂಬಿ ಶೇಖರಣಾ ಸಾಮರ್ಥ್ಯ ಇದ್ದ ಈ ಕೋಣೆಗಾತ್ರದ ಕಂಪ್ಯೂಟರಿನಿಂದ ಚಾರ್ಲಿ ಕಳಿಸಲು ಬಯಸಿದ್ದ ಸಂದೇಶದಲ್ಲಿ ಇದ್ದದ್ದು ಐದೇ ಅಕ್ಷರ - 'login'.

ಆದರೆ ಮೊದಲೆರಡು ಅಕ್ಷರ ಕಳುಹಿಸುವಷ್ಟರಲ್ಲೇ ಆ ಬದಿಯ ಕಂಪ್ಯೂಟರು ಕ್ರ್ಯಾಶ್ ಆಯಿತು. ಹೀಗಾಗಿ ಚಾರ್ಲಿಯ ಸಂದೇಶದಲ್ಲಿ ಸ್ಟಾನ್‌ಫರ್ಡ್ ರೀಸರ್ಚ್ ಇನ್ಸ್‌ಟಿಟ್ಯೂಟ್‌ನ ಕಂಪ್ಯೂಟರಿಗೆ ತಲುಪಿದ್ದು 'lo' ಎಂಬ ಅಕ್ಷರಗಳು ಮಾತ್ರ.

ಅಕ್ಟೋಬರ್ ೨೯, ೧೯೬೯ರಂದು ಮೊದಲ ಸಂದೇಶ ಕಳಿಸಲಾದ ಬಗ್ಗೆ ಬರೆದಿಟ್ಟಿರುವ ದಾಖಲೆ
ಅಕ್ಟೋಬರ್ ೨೯, ೧೯೬೯ರಂದು ಮೊದಲ ಸಂದೇಶ ಕಳಿಸಲಾದ ಬಗ್ಗೆ ಬರೆದಿಟ್ಟಿರುವ ದಾಖಲೆLeonard Kleinrock / lk.cs.ucla.edu

ನೀವು ಅದನ್ನು ಕನ್ನಡದ 'ಲೋ' ಎಂದಾದರೂ ಓದಿಕೊಳ್ಳಿ, ಇಂಗ್ಲಿಷಿನ 'lo and behold'ನ ಪೂರ್ವಾರ್ಧವೆಂದಾದರೂ ಅಂದುಕೊಳ್ಳಿ, ಮೆಸೇಜ್ ಭಾಷೆಯಲ್ಲಿ 'lol'ನ ಒಂದು ಭಾಗ ಎಂದಾದರೂ ಕೀಟಲೆ ಮಾಡಿ, ಅಂತರಜಾಲದ ಮೂಲಕ ಕಳಿಸಲಾದ ಮೊತ್ತಮೊದಲ ಸಂದೇಶ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿರುವುದು ಎರಡೇ ಅಕ್ಷರಗಳ ಈ ಅಪೂರ್ಣ ಪದ!

ಇದಾದ ಸುಮಾರು ಒಂದು ಗಂಟೆಯ ನಂತರ ಚಾರ್ಲಿಗೆ ತನ್ನ ಸಂದೇಶವನ್ನು ಪೂರ್ಣವಾಗಿ ಸ್ಟಾನ್‌ಫರ್ಡ್ ತನಕ ತಲುಪಿಸುವುದು ಸಾಧ್ಯವಾಯಿತು. ಇದಾದ ಎರಡು ವರ್ಷಗಳ ನಂತರ, 1971ರಲ್ಲಿ, ಆಧುನಿಕ ಇಮೇಲ್ ತಂತ್ರಜ್ಞಾನ ರೂಪುಗೊಂಡಿತು. ನಂತರದ ಮೂರು ವರ್ಷಗಳಲ್ಲಿ 'ಇಂಟರ್‌ನೆಟ್' ಎಂಬ ಹೆಸರೂ ಮೊದಲ ಬಾರಿಗೆ ಕೇಳಿಬಂತು.

ಅಲ್ಲಿಂದೀಚೆಗೆ ನಡೆದದ್ದು, ಮಾಹಿತಿ ತಂತ್ರಜ್ಞಾನದ ಮಹಾಕ್ರಾಂತಿ. ಎರಡು ಅಕ್ಷರಗಳನ್ನು ಕಳಿಸಲೇ ಕಷ್ಟಪಡಬೇಕಿದ್ದ ಅಂದಿನ ಕಾಲಕ್ಕೆ ಹೋಲಿಸಿದರೆ, ಇದೀಗ ನಾವು ವಾಟ್ಸ್‌ಆಪ್ ಒಂದರಲ್ಲೇ ದಿನಕ್ಕೆ 65 ಬಿಲಿಯನ್ ಸಂದೇಶಗಳನ್ನು ಕಳಿಸುತ್ತಿದ್ದೇವೆ. ಟ್ವಿಟರ್‌ನಲ್ಲಿ ಪ್ರತಿದಿನ 500 ಮಿಲಿಯನ್ ಟ್ವೀಟ್‌ಗಳನ್ನು ಮಾಡುತ್ತಿದ್ದೇವೆ. ತಜ್ಞರ ಅಂದಾಜಿನಂತೆ, ನಾವು ದಿನವೂ ಕಳಿಸುವ ಇಮೇಲ್‌ಗಳ ಸಂಖ್ಯೆ 2021ರ ವೇಳೆಗೆ 320 ಬಿಲಿಯನ್ ತಲುಪಲಿದೆಯಂತೆ!

ಅಕ್ಟೋಬರ್ ೨೯, ೨೦೧೯ರ ಉದಯವಾಣಿಯಲ್ಲಿ ಪ್ರಕಟವಾದ ಲೇಖನದ ಸಂಕ್ಷಿಪ್ತರೂಪ. ಪೂರ್ತಿ ಲೇಖನವನ್ನು ಉದಯವಾಣಿ ಜಾಲತಾಣದಲ್ಲಿ ಓದಬಹುದು.

Related Stories

No stories found.
logo
ಇಜ್ಞಾನ Ejnana
www.ejnana.com