ತಪ್ಪು ಮಾಹಿತಿ ಹರಡುತ್ತಿರುವ ಈ ವಿದ್ಯಮಾನವೂ COVID-19ನಂತೆಯೇ ನಮ್ಮೆಲ್ಲರ ಶತ್ರು
ತಪ್ಪು ಮಾಹಿತಿ ಹರಡುತ್ತಿರುವ ಈ ವಿದ್ಯಮಾನವೂ COVID-19ನಂತೆಯೇ ನಮ್ಮೆಲ್ಲರ ಶತ್ರು
ಕೊರೊನಾಲಜಿ

ಹೋರಾಟದಲ್ಲಿ ನಮ್ಮ ಪಾತ್ರವೇನು?

ವಿಜಯ ಕರ್ನಾಟಕ 'ಕೊರೊನಾಲಜಿ' ಅಂಕಣದಲ್ಲಿ ಪ್ರಕಟವಾದ ಬರಹ

ಟಿ. ಜಿ. ಶ್ರೀನಿಧಿ

ಯಾವುದೇ ಪ್ರಮುಖ ವಿಷಯ ಕುರಿತು ಸರಿಯಾದ ಮಾಹಿತಿ ಸಿಗದೇ ಇರುವುದು, ಅತಿಯಾಗಿ ಸಿಗುವುದು ಎರಡೂ ಆತಂಕಕಾರಿ. COVID-19 ವಿಷಯದಲ್ಲಿ ಆಗುತ್ತಿರುವುದು ಇದೇ. ಸಂವಹನದ ಎಲ್ಲ ಮಾಧ್ಯಮಗಳಲ್ಲೂ ಇದನ್ನು ಕುರಿತ ಮಾಹಿತಿಯೇ ತುಂಬಿಕೊಂಡಿದೆ, ಮತ್ತು ಮಾಹಿತಿಯ ಆ ರಾಶಿಯಲ್ಲಿ ಸತ್ಯ-ಸುಳ್ಳುಗಳೆರಡೂ ಬೆರೆತುಹೋಗಿವೆ. 'ಇನ್‌ಫೋಡೆಮಿಕ್' ಎಂದು ಕರೆಯಲಾಗಿರುವುದು ಇದನ್ನೇ. "ತಪ್ಪು ಮಾಹಿತಿ ಹರಡುತ್ತಿರುವ ಈ ವಿದ್ಯಮಾನವೂ COVID-19ನಂತೆಯೇ ನಮ್ಮೆಲ್ಲರ ಶತ್ರು" ಎಂದು ವಿಶ್ವಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಕೂಡ ಹೇಳಿದ್ದಾರೆ.

ತಪ್ಪು ಮಾಹಿತಿಯ ವಿರುದ್ಧದ ಈ ಹೋರಾಟದಲ್ಲಿ ನಾವು ಮಾಡಬಹುದಾದ ಕೆಲಸಗಳೂ ಬಹಳಷ್ಟಿವೆ. ಸಮಾಜ ಜಾಲಗಳಲ್ಲಿ ಸಂಯಮ ವಹಿಸುವ ಮೂಲಕ ತಪ್ಪುಮಾಹಿತಿಯ ಪ್ರಸಾರ ತಡೆಯುವುದು ಇಂತಹ ಕೆಲಸಗಳಲ್ಲೊಂದು. ಯಾವುದೇ ಮಾಹಿತಿಯ ನಿಖರತೆ ಬಗ್ಗೆ ಸಂಶಯ ಬಂದರೆ ಅದನ್ನು ಇತರರೊಡನೆ ಹಂಚಿಕೊಳ್ಳುವುದು ಖಂಡಿತಾ ಒಳ್ಳೆಯದಲ್ಲ. ಹಾಗೆಯೇ, ನಮಗೆ ಬೇಕಾಗುವ ಮಾಹಿತಿಗೆ WHOನಂತಹ ಜಾಗತಿಕ ಸಂಸ್ಥೆಗಳು, ನಮ್ಮ ಸರಕಾರ ಅಥವಾ ಅಂಥದ್ದೇ ವಿಶ್ವಾಸಾರ್ಹ ಆಕರಗಳನ್ನು ಮಾತ್ರ ಬಳಸುವುದು - ಅಲ್ಲಿರುವ ನಿರ್ದೇಶನಗಳನ್ನು ಮಾತ್ರ ಪಾಲಿಸುವುದು - ಅಪೇಕ್ಷಣೀಯ.

ಸದ್ಯದ ಪರಿಸ್ಥಿತಿಯಲ್ಲಿ ಹಿಂದೆಂದಿಗಿಂತ ಹೆಚ್ಚು ಜನರು ಅಂತರಜಾಲವನ್ನು ತಮ್ಮ ಮನೆಯಿಂದಲೇ ಬಳಸುತ್ತಿದ್ದಾರೆ. ಕಚೇರಿಗಳಿಗೆ ಹೋಲಿಸಿದಾಗ ನಾವು ಮನೆಗಳಲ್ಲಿ ಸೈಬರ್ ಸುರಕ್ಷತಾ ಕ್ರಮಗಳನ್ನು ಅಳವಡಿಸಿಕೊಳ್ಳುವುದು ಕಡಿಮೆ. ಇದನ್ನು ದುಷ್ಕರ್ಮಿಗಳು ದುರುಪಯೋಗಪಡಿಸಿಕೊಳ್ಳದಂತೆ ನೋಡಿಕೊಳ್ಳುವುದು ಕೂಡ ನಮ್ಮದೇ ಜವಾಬ್ದಾರಿ. COVID-19 ಹೆಸರಿನಲ್ಲಿ ಅವರು ಕಳುಹಿಸಬಹುದಾದ ಸ್ಪಾಮ್ ಸಂದೇಶಗಳನ್ನು - ಅಲ್ಲಿರುವ ಕೊಂಡಿಗಳನ್ನು ತೆರೆಯದಿರುವುದು, ಅಂತಹ ಸಂದೇಶಗಳಲ್ಲಿ ಹೇಳಿರುವ ತಾಣಗಳಲ್ಲಿ ನಮ್ಮ ಮಾಹಿತಿ ಹಂಚಿಕೊಳ್ಳದಿರುವುದು, ಅಲ್ಲಿಂದ ಏನನ್ನೂ ಡೌನ್‌ಲೋಡ್ ಮಾಡದಿರುವುದು ನಮ್ಮ ಸುರಕ್ಷತೆಯ ದೃಷ್ಟಿಯಿಂದ ಅಗತ್ಯ.

ಸೌಜನ್ಯ: ವಿಜಯ ಕರ್ನಾಟಕ

ಇಜ್ಞಾನ Ejnana
www.ejnana.com