ಬೆಳಕಿನ ದಿನ ವಿಶೇಷ: ಬೆಳಕೆಂಬ ಬೆರಗು

ಬೆಳಕಿನ ಮಹತ್ವ ಏನು ಎಂಬ ಪ್ರಶ್ನೆಗೆ ಉತ್ತರಿಸುವುದು ಬಹಳ ಸುಲಭ: ನಮ್ಮ ಸುತ್ತಮುತ್ತಲ ಪ್ರಪಂಚವನ್ನು ನೋಡಲು ಬೆಳಕು ಬೇಕು. ಸಸ್ಯಗಳು ಆಹಾರ ತಯಾರಿಸಿಕೊಳ್ಳಬೇಕಾದರೂ ಬೆಳಕು ಇರಬೇಕು. ಸೋಲಾರ್ ಹೀಟರಿನಲ್ಲಿ ನೀರು ಬಿಸಿಯಾಗುವುದೂ ಬೆಳಕಿನ ಸಹಾಯದಿಂದ. ಇದನ್ನೆಲ್ಲ ಬರೆದಿರುವ ಈ ಲೇಖನದ ಸಾಲುಗಳು ನಮಗೆ ಕಾಣುತ್ತಿರುವುದೂ ಬೆಳಕಿನ ಕಾರಣದಿಂದಲೇ!

ಇಂತಹ ಅನೇಕ ಉಪಯೋಗಗಳಿಗೆ ಒದಗಿಬರುವುದು ಸೂರ್ಯನ ಬೆಳಕು. ಸೂರ್ಯನ ಬೆಳಕು ಇಲ್ಲದಾಗ ಅಥವಾ ನಮ್ಮ ಅಗತ್ಯಕ್ಕೆ ಸಾಲದಾದಾಗ ನಾವು ಟ್ಯೂ‌ಬ್‌ಲೈಟ್, ಬಲ್ಬ್ ಮುಂತಾದ ಕೃತಕ ಬೆಳಕಿನ ಮೂಲಗಳನ್ನೂ ಬಳಸುತ್ತೇವೆ.

ಆದರೆ ಬೆಳಕಿನ ಮಹತ್ವ ಇಷ್ಟಕ್ಕೇ ಮುಗಿಯುವುದಿಲ್ಲ. ಸುಲಭವಾಗಿ ನಮ್ಮ ಗಮನಕ್ಕೆ ಬರದ, ಕೆಲವೊಮ್ಮೆ ನಮ್ಮ ಕಣ್ಣಿಗೂ ಕಾಣದ ಹಲವು ಬಗೆಗಳಲ್ಲಿ ಬೆಳಕು ನಮಗೆ ನೆರವಾಗುತ್ತದೆ.

ಇಂತಹ ಅನ್ವಯಗಳಿಗೆ ಲೇಸರ್ ಒಂದು ಉತ್ತಮ ಉದಾಹರಣೆ. ಕಡತಗಳನ್ನು ಉತ್ತಮ ಗುಣಮಟ್ಟದಲ್ಲಿ ಮುದ್ರಿಸುವುದಿರಲಿ, ಕಣ್ಣಿನ ಶಸ್ತ್ರಚಿಕಿತ್ಸೆಯಂತಹ ಕ್ಲಿಷ್ಟ ಕೆಲಸವೇ ಇರಲಿ - ಇಂದು ಲೇಸರ್ ಕಿರಣಗಳು ಅನೇಕ ಉದ್ದೇಶಗಳಿಗಾಗಿ ಬಳಕೆಯಾಗುತ್ತವೆ. ಬೆಳಕಿಗೆ ಸಂಬಂಧಪಟ್ಟ ಒಂದೇ ಆವಿಷ್ಕಾರ ಸಂವಹನ, ಆರೋಗ್ಯ, ಕೈಗಾರಿಕೆ ಸೇರಿದಂತೆ ಅನೇಕ ಕ್ಷೇತ್ರಗಳಲ್ಲಿ ನಮ್ಮ ಬದುಕನ್ನು ಹೇಗೆ ಪ್ರಭಾವಿಸುವುದು ಸಾಧ್ಯವೆಂದು ತೋರಿಸಿಕೊಟ್ಟಿದ್ದು ಲೇಸರ್. ಹೀಗಾಗಿಯೇ ೧೯೬೦ನೇ ಇಸವಿಯಲ್ಲಿ ಲೇಸರ್ ಆವಿಷ್ಕಾರವಾದ ಮೇ ೧೬ನೇ ದಿನಾಂಕವನ್ನು ಇದೀಗ ಅಂತಾರಾಷ್ಟ್ರೀಯ ಬೆಳಕಿನ ದಿನವೆಂದು (ಇಂಟರ್‌ನ್ಯಾಶನಲ್ ಡೇ ಆಫ್ ಲೈಟ್) ಆಚರಿಸಲಾಗುತ್ತಿದೆ.

ಬೆಳಕಿನ ವಿಶ್ವರೂಪ

ಬೆಳಕಿಗೆ ಸಂಬಂಧಪಟ್ಟ, ಬರಿಗಣ್ಣಿಗೆ ಕಾಣದಿದ್ದರೂ ಪರೋಕ್ಷವಾಗಿ ನಮ್ಮ ಅನುಭವಕ್ಕೆ ಬರುವ ವಿದ್ಯಮಾನಗಳು ಇನ್ನೂ ಬಹಳಷ್ಟಿವೆ. ದೂರದ ಉದಾಹರಣೆಗಳೆಲ್ಲ ಏಕೆ, ರಿಮೋಟಿನ ಗುಂಡಿ ಒತ್ತಿದಾಗ ಟೀವಿಯನ್ನು ಚಾಲೂ ಮಾಡುವುದೂ ಬೆಳಕಿನ ಕಿರಣಗಳೇ. ರೇಡಿಯೋ ಅಲೆಗಳು, ಮೈಕ್ರೋತರಂಗಗಳು (ಮೈಕ್ರೋವೇವ್), ಅತಿನೇರಳೆ (ಅಲ್ಟ್ರಾವಯಲೆಟ್), ಅವರಕ್ತ (ಇನ್‌ಫ್ರಾರೆಡ್) ಕಿರಣಗಳ ಬಗೆಗೆಲ್ಲ ಕೇಳುತ್ತೇವಲ್ಲ - ಅವೂ ಬೆಳಕಿನ ಅಲೆಗಳೇ!

ಮೊಬೈಲಿನಲ್ಲೋ ಕಂಪ್ಯೂಟರಿನಲ್ಲೋ ಬ್ರೌಸರ್ ತಂತ್ರಾಂಶ ಬಳಸಿ ಜಾಲತಾಣಗಳನ್ನು ತೆರೆಯುವುದು ನಮಗೆಲ್ಲ ಚೆನ್ನಾಗಿ ಗೊತ್ತು. ಜಾಲತಾಣದ ವಿಳಾಸವನ್ನು ಟೈಪ್ ಮಾಡಿದ ಕೆಲವೇ ಕ್ಷಣಗಳಲ್ಲಿ ಬೇಕಾದ ಮಾಹಿತಿ ನಮ್ಮ ಕಣ್ಣೆದುರು ಪ್ರತ್ಯಕ್ಷವಾಗಿಬಿಡುತ್ತದೆ. ಈ ಪ್ರಕ್ರಿಯೆ ಅತ್ಯಂತ ವೇಗವಾಗಿ ಮುಗಿದುಹೋಗುತ್ತದೆ, ನಿಜ. ಆದರೆ ಆ ಮಾಹಿತಿಯೆಲ್ಲ ನಮ್ಮನ್ನು ತಲುಪಲು ಸಾಕಷ್ಟು ದೂರ - ಕೆಲವೊಮ್ಮೆ ಪ್ರಪಂಚದ ಬೇರೆಯದೇ ಮೂಲೆಯಿಂದ - ಪ್ರಯಾಣಿಸಿ ಬಂದಿರುತ್ತದೆ. ಈ ಪ್ರಯಾಣದ ಬಹುಭಾಗ ಸಾಗುವುದು ಸಮುದ್ರದಾಳದಲ್ಲಿ ಅಥವಾ ನೆಲದಾಳದಲ್ಲಿ ಹುದುಗಿರುವ ಆಪ್ಟಿಕಲ್ ಫೈಬರ್ ಕೇಬಲ್ಲುಗಳ (ಓಎಫ್‌ಸಿ) ಮೂಲಕ. ಈ ಕೇಬಲ್ಲುಗಳೊಳಗೆ ಆಪ್ಟಿಕಲ್ ಫೈಬರ್‌ಗಳೆಂಬ, ಗಾಜು ಅಥವಾ ಪ್ಲಾಸ್ಟಿಕ್ಕಿನಿಂದ ಮಾಡಿದ, ತೆಳುವಾದ ಎಳೆಗಳಿರುತ್ತವೆ. ಈ ಎಳೆಗಳೊಳಗೆ ನಮ್ಮ ಮಾಹಿತಿ ಸಾಗುವುದು ಬೆಳಕಿನ ಕಿರಣಗಳ ರೂಪದಲ್ಲಿ!

ವೈ-ಫೈ ಅಲ್ಲ, ಇದು ಲೈ-ಫೈ!

ಕೇಬಲ್ಲುಗಳ ಸಹಾಯದಿಂದ ನಮ್ಮ ಮನೆ ತಲುಪುವ ಅಂತರಜಾಲ ಸಂಪರ್ಕ ಮೋಡೆಮ್‌ನಿಂದ ಮುಂದಕ್ಕೆ ನಮ್ಮ ಮೊಬೈಲು-ಕಂಪ್ಯೂಟರುಗಳನ್ನು ತಲುಪುವ ಕೊನೆಯ ಹಂತದಲ್ಲಿ ನಿಸ್ತಂತು ತಂತ್ರಜ್ಞಾನವನ್ನು (ವೈರ್‌ಲೆಸ್ ಫಿಡೆಲಿಟಿ ಅಥವಾ ವೈ-ಫೈ) ಬಳಸುವುದು ಸಾಮಾನ್ಯ. ಈಗ ಪ್ರಚಲಿತದಲ್ಲಿರುವ ವೈ-ಫೈ ವ್ಯವಸ್ಥೆಗಳು ಈ ಸಂವಹನಕ್ಕೆ ರೇಡಿಯೋ ಅಲೆಗಳನ್ನು ಬಳಸುತ್ತವೆ. ಈ ಉದ್ದೇಶಕ್ಕಾಗಿ ರೇಡಿಯೋ ಅಲೆಗಳ ಬದಲು ಬೆಳಕನ್ನು ಬಳಸುವುದೂ ಸಾಧ್ಯ ಎಂದು ತಂತ್ರಜ್ಞರು ತೋರಿಸಿದ್ದಾರೆ.

ಮನೆಯಲ್ಲಿ ವೈ-ಫೈ ಸೌಲಭ್ಯ ಬಳಸುವವರಾದರೆ ನೀವು ಮೋಡೆಮ್ ಸಾಧನವನ್ನೂ ಅದರ ಆಂಟೆನಾವನ್ನೂ ನೋಡಿಯೇ ಇರುತ್ತೀರಿ. ಬಹಳಷ್ಟು ಆಧುನಿಕ ಮೋಡೆಮ್‌ಗಳಲ್ಲಿ ಅಡಕವಾಗಿರುವ ರೂಟರ್ ಎಂಬ ಸಾಧನ ಅಂತರಜಾಲದ ಮೂಲಕ ಹರಿದುಬರುವ ಸಂಕೇತಗಳನ್ನು ರೇಡಿಯೋ ಅಲೆಗಳಾಗಿ ಪರಿವರ್ತಿಸಿ ನಮ್ಮ ಮೊಬೈಲು-ಕಂಪ್ಯೂಟರುಗಳಿಗೆ ಒದಗಿಸಿಕೊಡುತ್ತದೆ. ಈ ಸಾಧನದ ಕೆಲಸವನ್ನು ಎಲ್‌ಇಡಿ ಬಲ್ಬುಗಳೇ ಮಾಡಬಹುದು ಎನ್ನುವುದು ತಂತ್ರಜ್ಞರ ಅಭಿಪ್ರಾಯ. ರೇಡಿಯೋ ಅಲೆಗಳ ಬದಲು ಬೆಳಕಿನ ಮೂಲಕ ಮಾಹಿತಿ ಸಂವಹನ ಸಾಧ್ಯವಾಗಿಸುವ ಈ ತಂತ್ರಜ್ಞಾನಕ್ಕೆ ಲೈಟ್ ಫಿಡೆಲಿಟಿ ಅಥವಾ ಲೈ-ಫೈ ಎಂದು ಹೆಸರಿಡಲಾಗಿದೆ.

ವಿಸಿಬಲ್ ಲೈಟ್ ಕಮ್ಯೂನಿಕೇಶನ್

ಬೆಳಕಿನ ಮೂಲಕ ಮಾಹಿತಿ ಪ್ರಸರಣ ಕೇವಲ ಲೈ-ಫೈ ತಂತ್ರಜ್ಞಾನಕ್ಕೆ ಮಾತ್ರವೇ ಸೀಮಿತವೇನಲ್ಲ. ಹಿಂದಿನ ಕಾಲದಲ್ಲಿ ಬೆಂಕಿಯ ಮೂಲಕ ಮೂಲಕ ಸಂಕೇತಗಳನ್ನು ನೀಡುತ್ತಿದ್ದಂತೆ (ಸಿಗ್ನಲ್ ಫೈರ್) ಈಗಲೂ ಬೆಳಕಿನ ಮೂಲಕ ಮಾಹಿತಿ ಪ್ರಸಾರ ಮಾಡುವ 'ವಿಸಿಬಲ್ ಲೈಟ್ ಕಮ್ಯೂನಿಕೇಶನ್' ಎಂಬ ಸಂವಹನ ವಿಧಾನವೇ ಇದೆ. ನಮ್ಮ ಮನೆಗಳಲ್ಲಿರುತ್ತದಲ್ಲ, ಅಂತಹವೇ ವಿದ್ಯುತ್ ದೀಪಗಳನ್ನು ಬಳಸಿ ಈ ಸಂವಹನವಿಧಾನ ಕೆಲಸಮಾಡುತ್ತದೆ. ಮಾನವರ ಗ್ರಹಿಕೆಗೆ ಬಾರದಷ್ಟು ವೇಗವಾಗಿ ದೀಪಗಳನ್ನು ಹೊತ್ತಿಸಿ ಆರಿಸುವ ಮೂಲಕ ಈ ವಿಧಾನದಲ್ಲಿ ಮಾಹಿತಿಯನ್ನು ರವಾನಿಸುವುದು ಸಾಧ್ಯವಂತೆ.

ಬೆಳಕಿನ ಉಪಯೋಗ ನಮ್ಮ ಭೂಮಿಗಷ್ಟೇ ಸೀಮಿತವೇನಲ್ಲ. ಹವಾಮಾನ ಪರಿವೀಕ್ಷಣೆಯಿಂದ ಪ್ರಾರಂಭಿಸಿ ಬಾಹ್ಯಾಕಾಶ ಸಂಶೋಧನೆಯವರೆಗೆ ಎಲ್ಲೆಡೆಯೂ ಒಂದಲ್ಲ ಒಂದು ರೀತಿಯ ಬೆಳಕು ಪ್ರಯೋಜನಕ್ಕೆ ಬರುತ್ತದೆ.

ಫೋಟಾನಿಕ್ಸ್

ಅಷ್ಟೇ ಅಲ್ಲ, ಬೆಳಕಿನ ಬಳಕೆ ಹಾಗೂ ಅದರ ಉಪಯೋಗಗಳ ಸುತ್ತ ಫೋಟಾನಿಕ್ಸ್ (Photonics) ಎಂಬ ವಿಜ್ಞಾನದ ಶಾಖೆಯೇ ಬೆಳೆದಿದೆ. ಬೆಳಕಿನ ಸೂಕ್ಷ್ಮ ಕಣಗಳಾದ ಫೋಟಾನುಗಳ ಉತ್ಪಾದನೆ, ನಿಯಂತ್ರಣ ಹಾಗೂ ಗುರುತಿಸುವಿಕೆಗೆ ಬೇಕಾದ ವಿಜ್ಞಾನ ಹಾಗೂ ತಂತ್ರಜ್ಞಾನಗಳ ಸಮ್ಮಿಲನವೇ ಇದು. ಸ್ಮಾರ್ಟ್‌ಫೋನುಗಳಿಂದ ಲ್ಯಾಪ್‌ಟಾಪ್‌ಗಳವರೆಗೆ, ಕೃತಕ ಬೆಳಕಿನ ಮೂಲಗಳಿಂದ ವೈದ್ಯಕೀಯ ಸಾಧನಗಳವರೆಗೆ ಪ್ರತಿಯೊಂದು ಕ್ಷೇತ್ರದಲ್ಲೂ ಫೋಟಾನಿಕ್ಸ್ ಇಂದು ಪ್ರಮುಖ ಪಾತ್ರ ವಹಿಸುತ್ತಿದೆ. ಕಳೆದ ಶತಮಾನದಲ್ಲಿ ವಿದ್ಯುನ್ಮಾನ ವಿಜ್ಞಾನ (ಇಲೆಕ್ಟ್ರಾನಿಕ್ಸ್) ವಹಿಸಿದಂತಹುದೇ ಪಾತ್ರವನ್ನು ಈ ಶತಮಾನದಲ್ಲಿ ಬೆಳಕಿನ ವಿಜ್ಞಾನ (ಫೋಟಾನಿಕ್ಸ್) ವಹಿಸಲಿದೆ ಎನ್ನುವುದು ವಿಜ್ಞಾನಿಗಳ ನಿರೀಕ್ಷೆ.