ಕೋವಿಡ್-೧೯ ಬಾಧಿತರಿಂದ ಮಾತ್ರವೇ ಅಲ್ಲ, ಅವರ ಸಂಪರ್ಕಕ್ಕೆ ಬಂದ ವಸ್ತುಗಳ ಮೂಲಕವೂ ಆ ರೋಗಕ್ಕೆ ಕಾರಣವಾಗುವ ಕೊರೊನಾವೈರಸ್ ಬೇರೆಯವರಿಗೆ ಹರಡಬಹುದು!
ಕೋವಿಡ್-೧೯ ಬಾಧಿತರಿಂದ ಮಾತ್ರವೇ ಅಲ್ಲ, ಅವರ ಸಂಪರ್ಕಕ್ಕೆ ಬಂದ ವಸ್ತುಗಳ ಮೂಲಕವೂ ಆ ರೋಗಕ್ಕೆ ಕಾರಣವಾಗುವ ಕೊರೊನಾವೈರಸ್ ಬೇರೆಯವರಿಗೆ ಹರಡಬಹುದು!
ಕೊರೊನಾಲಜಿ

ಫೋಮೈಟ್ ಅಂದರೆ ಏನು?

ವಿಜಯ ಕರ್ನಾಟಕ 'ಕೊರೊನಾಲಜಿ' ಅಂಕಣದಲ್ಲಿ ಪ್ರಕಟವಾದ ಬರಹ

ಟಿ. ಜಿ. ಶ್ರೀನಿಧಿ

ಕೋವಿಡ್-೧೯ ಬಾಧಿತರಿಂದ ಮಾತ್ರವೇ ಅಲ್ಲ, ಅವರ ಸಂಪರ್ಕಕ್ಕೆ ಬಂದ ವಸ್ತುಗಳ ಮೂಲಕವೂ ಆ ರೋಗಕ್ಕೆ ಕಾರಣವಾಗುವ ಕೊರೊನಾವೈರಸ್ ಬೇರೆಯವರಿಗೆ ಹರಡಬಹುದು. ರೋಗಪೀಡಿತರು ಕೆಮ್ಮಿದಾಗ ಅಥವಾ ಸೀನಿದಾಗ ಅವರ ಮೂಗು-ಬಾಯಿಯಿಂದ ಹೊರಬರುವ ಸಣ್ಣ ಹನಿಗಳು ಅಕ್ಕಪಕ್ಕದ ವಸ್ತುಗಳ ಮೇಲೆ ಬಿದ್ದರೆ, ಆನಂತರ ಆ ವಸ್ತುಗಳನ್ನು ಮುಟ್ಟುವ ನಮಗೂ ರೋಗ ಬರುವುದು ಸಾಧ್ಯ.

ಇಂತಹ ವಸ್ತುಗಳನ್ನು 'ಫೋಮೈಟ್'ಗಳೆಂದು ಕರೆಯುತ್ತಾರೆ. ಬಾಗಿಲು, ಅದರ ಹಿಡಿ, ಮೆಟ್ಟಿಲ ಪಕ್ಕದ ಕಂಬಿ, ಲಿಫ್ಟಿನ ಗುಂಡಿ, ಎಟಿಎಂ ಪರದೆ ಸೇರಿದಂತೆ ಯಾವುದೇ ಮೇಲ್ಮೈ ಸಂಭಾವ್ಯ ಫೋಮೈಟ್‌ ಆಗಿರಬಹುದು. ಇಂತಹ ಮೇಲ್ಮೈಗಳನ್ನು ಮುಟ್ಟಿ ಅದೇ ಕೈಯಿಂದ ನಮ್ಮ ಕಣ್ಣು, ಮೂಗು ಅಥವಾ ಬಾಯಿಯನ್ನೂ ಮುಟ್ಟಿಕೊಂಡರೆ ಅಲ್ಲಿರಬಹುದಾದ ಕೊರೊನಾವೈರಸ್‌ ನಮ್ಮನ್ನೂ ಬಾಧಿಸಬಹುದು.

ಈ ವೈರಸ್ ವಿವಿಧ ಮೇಲ್ಮೈ‌ಗಳ ಮೇಲೆ ಕೆಲವು ಗಂಟೆಗಳಿಂದ ಕೆಲ ದಿನಗಳವರೆಗೆ ಉಳಿದುಕೊಳ್ಳಬಹುದು ಎಂದು ಅಧ್ಯಯನಗಳು ತೋರಿಸಿವೆ. ಆದರೆ ಈ ಅವಧಿ ಬೇರೆಬೇರೆ ಸನ್ನಿವೇಶಗಳಲ್ಲಿ (ಉದಾ: ಮೇಲ್ಮೈಯ ಸ್ವರೂಪ, ವಾತಾವರಣದ ಉಷ್ಣತೆ ಅಥವಾ ತೇವಾಂಶದಲ್ಲಿ ವ್ಯತ್ಯಾಸವಿದ್ದಾಗ) ಬೇರೆಬೇರೆಯಾಗಿರುವುದು ಸಾಧ್ಯ. ಹೀಗಾಗಿ ಕೋವಿಡ್-೧೯ ಉಂಟುಮಾಡುವ ಕೊರೊನಾವೈರಸ್ ಬೇರೆಬೇರೆ ಮೇಲ್ಮೈಗಳ ಮೇಲೆ ನಿರ್ದಿಷ್ಟವಾಗಿ ಎಷ್ಟು ಹೊತ್ತು ಉಳಿದಿರುತ್ತದೆ ಎನ್ನುವ ಬಗ್ಗೆ ಇನ್ನೂ ಖಚಿತತೆ ಇಲ್ಲವೆಂದು ವಿಶ್ವ ಆರೋಗ್ಯ ಸಂಸ್ಥೆ ಹೇಳಿದೆ

ಹೀಗಾಗಿ, ನಾವು ಮುಟ್ಟಿದ ಯಾವುದೇ ಮೇಲ್ಮೈ ಸೋಂಕಿತವಾಗಿರಬಹುದು ಎನ್ನಿಸಿದರೆ ನಮ್ಮ ಕೈಗಳನ್ನು ತಕ್ಷಣವೇ ನೀರು-ಸೋಪು ಅಥವಾ ಆಲ್ಕೋಹಾಲ್-ಆಧರಿತ ಸ್ಯಾನಿಟೈಸರ್ ಬಳಸಿ ಸ್ವಚ್ಛಮಾಡಿಕೊಳ್ಳುವುದು ಮತ್ತು ಕಣ್ಣುಗಳು, ಬಾಯಿ ಹಾಗೂ ಮೂಗನ್ನು ಮುಟ್ಟಿಕೊಳ್ಳದಿರುವುದು ಬಹಳ ಮುಖ್ಯ. ಸಾಧ್ಯವಾದರೆ ಆ ಮೇಲ್ಮೈ‌ಯನ್ನು ಸೋಂಕುನಿವಾರಕ ಬಳಸಿ ಶುಚಿಗೊಳಿಸುವುದೂ ಒಳ್ಳೆಯದು.

ಸೌಜನ್ಯ: ವಿಜಯ ಕರ್ನಾಟಕ

ಇಜ್ಞಾನ Ejnana
www.ejnana.com